dil bhī aap ko bhuul chukā hai
sāhab aap se parda kyā hai
kahne sunñe kī bāteñ haiñ
kaun kise apnā saktā hai
ishq meñ kyā sachchā kyā jhūTā
ye to umroñ kā ronā hai
haal hamārā pūchhne vaale
kyā batlā.eñ sab achchhā hai
kyā kyā baat na ban saktī thī
lekin ab kyā ho saktā hai
ab bhī dil ke darvāze par
ek diyā jaltā rahtā hai
kab tak saath nibhātā āḳhir
vo bhī duniyā meñ rahtā hai
duniyā par kyuuñ dosh dhareñ ham
apnā dil bhī kab apnā hai