logoñ kī malāmat bhī hai ḳhud dard-sarī bhī
kis kaam kī ye apnī vasī.a-un-nazarī bhī
kyā jāniye kyuuñ sust thī kal zehan kī raftār
mumkin hui tāroñ se mirī ham-safarī bhī
rātoñ ko kalī ban ke chaTaktā thā tirā jism
dhoke meñ chalī aa.ī nasīm-e-saharī bhī
ḳhud apne shab-o-roz guzar jā.eñge lekin
shāmil hai mire ġham meñ tirī dar-ba-darī bhī
furqat ke shab-o-roz meñ kyā kuchh nahīñ hotā
qudarat pe malāmat bhī duā-e-saharī bhī
ik fard kī ulfat to baḌī kam-nazarī hai
hai kis meñ magar ahliyat-e-kam-nazarī bhī