aur hoñge vo jinheñ zabt kā da.avā hogā
har bun-e-mū se yahāñ zikr kisī kā hogā
husn kyuuñ ishq kī tash.hīr pe shādāñ hai bahut
ishq rusvā hai to kyā husn na rusvā hogā
ashk ban ban ke vo āñkhoñ se Tapak jā.egī
kyā ḳhabar thī ki ye anjām-e-tamannā hogā
kahīñ rusvā na kare hairat-e-dīdār mujhe
aaj vo jalva-e-mastūr huvaidā hogā
dil hī āshob-e-zamāna kā sabab hai 'sīmāb'
dil na hogā to koī hashr na barpā hogā