ruḳh tirā māhtāb kī sūrat
aañkh jām-e-sharāb kī sūrat
merī fikr-e-suḳhan bhī rañgīñ hai
tere husn-e-shabāb kī sūrat
merī āñkhoñ meñ aa ke bas jaao
ek rañgīn ḳhvāb kī sūrat
mere dil par muhīt ho jaao
kaif-e-jām-e-sharāb kī sūrat
mujh ko marġhūb hai tirī āvāz
naġhma-hā-e-rabāb kī sūrat
jin ke sar meñ havā samā.ī thī
miT ga.e vo habāb kī sūrat
un kī merī misāl hai 'sīmāb'
shabnam-o-āftāb kī sūrat