kuchh is adā se koī dam-ba-dam lubhā.e mujhe
ki hārne bhī na de aur āzmā.e mujhe
is intizār meñ huuñ naqsh-e-rā.egāñ ho kar
tirā karam kisī mehrāb meñ sajā.e mujhe
tire nisār kisī aise ġham-gusār ko bhej
ki dil kī bhūl-bhulayyoñ se DhūñD laa.e mujhe
ye jī meñ hai ki sarāpā vo naġhma ban jā.ūñ
ki jis ko tujh se mohabbat ho gungunā.e mujhe
kisī kī dhun meñ pareshāñ to huuñ bikhar hī na jā.ūñ
gale na mauja-e-bād-e-sabā lagā.e mujhe
guloñ se kam nahīñ kāñToñ kī sej bhī 'ḳhurshīd'
ḳhayāl-e-yār agar chain se sulā.e mujhe