vo jo log ahl-e-kamāl the vo kahāñ ga.e
vo jo aap apnī misāl the vo kahāñ ga.e
mire dil meñ rah ga.ī sirf hairat-e-ā.ina
vo jo naqsh the ḳhad-o-ḳhāl the vo kahāñ ga.e
girī āsmāñ se to ḳhaak ḳhaak meñ aa milī
kabhī ḳhaak meñ par-o-bāl the vo kahāñ ga.e
sar-e-jāñ ye kyuuñ faqat ek shaam Thahar ga.ī
shab-o-roz the mah-o-sāl the vo kahāñ ga.e
mire zehn kā ye shajar udaas udaas hai
vo jo tā.irān-e-ḳhayāl the vo kahāñ ga.e