yahī hai ishq ki sar do magar duhā.ī na do
vafūr-e-jazb se TuuTū magar sunā.ī na do
zamīñ se ek ta.alluq hai nā-guzīr magar
jo ho sake to ise rañg-e-āshnā.ī na do
ye daur vo hai ki baiThe raho charāġh-tale
sabhī ko bazm meñ dekho magar dikhā.ī na do
shahanshahī bhī jo dil ke evaz mile to na lo
farāz-e-koh ke badle bhī ye tarā.ī na do
javāb-e-tohmat-e-ahl-e-zamāna meñ 'ḳhurshīd'
yahī bahut hai ki lab sī rakho safā.ī na do