vafā kī shaan vo lekin kabhī mire na hue
hai merī jaan vo lekin kabhī mire na hue
unhīñ kā zikr ġhazal bhī vahī fasāna bhī
suḳhan kī aan vo lekin kabhī mire na hue
nasha hai un kī sadā kā ki dhaḌkaneñ merī
rahā gumān vo lekin kabhī mire na hue
guloñ meñ rañg unhīñ se mahak mahak un se
chaman kī shaan vo lekin kabhī mire na hue
vahī haiñ shams o qamar bahr o bar mire 'mītā'
haiñ ik jahān vo lekin kabhī mire na hue