kaheñge kis se haiñ ḳhud apnī teġh ke ghāyal

na iḳhtiyār pe qaabū na jabr ke qaa.il

maiñ ḳhud huuñ apnī tamannā-farebiyoñ kā shikār

jo dil pe guzre guzar jaa.e par na tū ho ḳhajil

hayāt vaqfa-e-rāhat hai rāh-rau ke liye

adam se tā-ba-adam hai safar kī ik manzil

naved-e-ālam-e-nau de rahā hai sail-e-iram

chhupe hue haiñ samundar kī tah meñ bhī sāhil

na baḌh sakā had-e-idrāk se shu.ūr-e-talab

gunāhgār huuñ maiñ apne hausloñ se ḳhajil

hai bār-e-dosh hamāre liye bhī sar apnā

tumhāre shahr meñ phirte haiñ ab khule qātil

mujhe to sadma-e-furqat se itnā hosh na thā

tumheñ ḳhabar hai ye kis kā dhaḌak rahā thā dil

abhī se garmī-e-āġhosh-e-mauj-e-bahr kahāñ

bahut hai duur abhī to murād kā sāhil

vo chaaT lete haiñ kaliyoñ se qatra-e-shabnam

jinheñ samajhte haiñ duniyā meñ log dariyā-dil

hamīñ ne dard ko saare jahāñ ke apnāyā

hamīñ ko log samajhte haiñ mujrim-o-qātil

muāhida bhalā sayyād-o-said meñ kaisā

ye ittifāq hai vo bhī haiñ aaj pā-dar-gil

qalandarān-e-tahī-dast kuchh nahīñ rakhte

zah-e-nasīb agar ho qubūl hadiya-e-dil

vo 'qādrī' ko samajhte haiñ jāñ-nisāroñ meñ

karam hai un kā faqat ham nahīñ kisī qābil