zikr-e-shab ke sa.iid ho ga.e kyā
sahar-sā.e ba.iid ho ga.e kyā
dard kun se kashīd ho ga.e kyā
ḳhvāb shab se ḳharīd ho ga.e kyā
zindagī kyuuñ hai larza-bar-andām
zalzale bhī shadīd ho ga.e kyā
koī baaqī nahīñ tilism-e-jamāl
ishq vaale shahīd ho ga.e kyā
adab-ādāb ke zamāne ga.e
silsile kuchh mazīd ho ga.e kyā
hijr hijrat malāl ġham āsār
zindagī kī naved ho ga.e kyā
na koī maslahat na bebākī
fard 'farhat' farīd ho ga.e kyā