bas koī aisī kamī saare safar meñ rah ga.ī

jaise koī chiiz chalte vaqt ghar meñ rah ga.ī

kaun ye chaltā hai mere saath be-jism-o-sadā

chaap ye kis kī mirī har rahguzar meñ rah ga.ī

gūñjte rahte haiñ tanhā.ī meñ bhī dīvār-o-dar

kyā sadā us ne mujhe dī thī ki ghar meñ rah ga.ī

aur to mausam guzar kar jā chukā vaadī ke paar

bas zarā sī barf har sūkhe shajar meñ rah ga.ī

raat dariyā meñ phir ik sho.ala sā chakrātā rahā

phir koī jaltī huī kashtī bhañvar meñ rah ga.ī

raat bhar hotā rahā hai kin ḳhazānoñ kā nuzūl

motiyoñ kī sī jhalak har barg-e-tar meñ rah ga.ī

lauT kar aa.e na kyuuñ jaate hue lamhe 'adīm'

kyā kamī merī sadā-e-be-asar meñ rah ga.ī