tirā tazkira sū-ba-sū kyuuñ kareñ ham
mohabbat ko be-ābrū kyuuñ kareñ ham
likhī hai muqaddar meñ nā-kāmyābī
kareñ to ġham-e-ārzū kyuuñ kareñ ham
agar rañg-o-bū is chaman kā hai faanī
nazar mā.il-e-rañg-o-bū kyuuñ kareñ ham
hasīnoñ kā pās-e-vafā ġhair-mumkin
hasīnoñ se ye aarzū kyuuñ kareñ ham
adāvat hī jab hāsil-e-dostī hai
mohabbat kī phir aarzū kyuuñ kareñ ham
kareñ kyuuñ tumhāre sitam kī shikāyat
mohabbat ko be-ābrū kyuuñ kareñ ham
agar 'shād' ham ḳhud hī kho.e hue haiñ
kisī aur kī justujū kyuuñ kareñ ham