jab ruḳh-e-husn se naqāb uThā

ban ke har zarra āftāb uThā

Duubī jaatī hai zabt kī kashtī

dil meñ tūfān-e-iztirāb uThā

marne vaale fanā bhī parda hai

uTh sake gar to ye hijāb uThā

shāhid-e-mai kī ḳhalvatoñ meñ pahuñch

parda-e-nashsha-e-sharāb uThā

ham to āñkhoñ kā nuur kho baiThe

un ke chehre se kyā naqāb uThā

ālam-e-husn-e-sādgī tauba

ishq khā khā ke pech-o-tāb uThā

hosh naqs-e-ḳhudī hai ai 'ehsān'

lā uThā shīsha-e-sharāb uThā