jiine ke liye jo mar rahe haiñ
āġhāz-e-hayāt kar rahe haiñ
hai husn kā naam muft badnām
log apnī talab meñ mar rahe haiñ
ġhunchoñ kī tarah khile the kuchh log
kirnoñ kī tarah bikhar rahe haiñ
hai naqsh-e-qadam pe naqsh-e-zanjīr
dīvāne jidhar guzar rahe haiñ
suntā huuñ ki aap ke vafādār
anjām-e-vafā se Dar rahe haiñ
sāhil ko bhī chhoḌte nahīñ log
kashtī pe bhī paañv dhar rahe haiñ
ab dasht meñ narm-rau havā se
kuchh naqsh-e-qadam nikhar rahe haiñ
rūhoñ meñ na.ī sahar ke baa.is
zehnoñ ke nashe utar rahe haiñ
ham jaise tamām nām-levā
dhabbā tire naam par rahe haiñ
ḳhushbū se ladī bahār meñ bhī
ham dard se bahra-var rahe haiñ
har daur ke fan-shanās 'dānish'
nākām-e-husūl-e-zar rahe haiñ