mausam se rañg-o-bū haiñ ḳhafā dekhte chalo
ye kyā chalī chaman meñ havā dekhte chalo
ambār har taraf haiñ añdheroñ ke ye durust
shāyad nahīñ ho āb-e-baqā dekhte chalo
taskīn-e-sumbul-o-gul-o-lāla ke vāste
kyā de rahī hai bād-e-sabā dekhte chalo
jitne the jāñ-nisār-e-chaman ba.ad-e-sub.h-e-nau
kuchh ajr bhī kisī ko milā dekhte chalo
asnām-e-zar ke paañv meñ Daale hue jabīñ
kitne haiñ bandagān-e-ḳhudā dekhte chalo
kis kis kā e'timād-e-vafā ho gayā shikast
kis kis ko husn se hai gilā dekhte chalo
'dānish' ko zid hai dair o haram bhī sahī magar
kis ko milā hai in kā patā dekhte chalo