dasht-e-viġha meñ nūr-e-ḳhudā kā zuhūr hai
dasht-e-viġhā meñ nūr-e-ḳhudā kā zuhūr hai
hairāñ zamīñ ke nuur se hai charḳh-e-lājvard
mānind-e-kahrubā hai ruḳh-e-āftāb-e-zard
hai āb-e-nahr sūrat-e-ā.īna jalva-gar
tābāñ hai misl-e-chashma-e-ḳhurshīd har bhañvar
partav-fagan huā jo ruḳh-e-qibla-e-anām
mash.hūr ho ga.ī vo zamīñ arsh-ehtishām
phailā jo nūr-e-mahr-e-imāmat dam-e-zavāl
zarroñ se vaañ ke aañkh milānā huā muhāl
ġhul thā zahe husain kī shaukat zahe vaqār
goyā khaḌe haiñ jañg ko mahbūb-e-kirdgār
ye rū-e-raushan aur ye gesu-e-mushk-e-fām
yaañ shaam meñ to sub.h hai aur sub.h meñ hai shaam
qurbāñ kamān-e-abrū-e-maulā pe jaan o dil
gar māh-e-nau kaheñ to hai tashbīh mubtazil
ruḳhsār haiñ ziyā meñ qamar se ziyāda-tar
jin par Thahar sakī na kabhī shams kī nazar
kis muñh se kījiye lab-e-jān-baḳhsh kā bayāñ
chūsī jinhoñ ne ahmad muḳhtār kī zabāñ
sham-e-harīm-e-lam-yazalī thā gulū-e-shāh
tārīk shab meñ jaise huvaidā ho nūr-e-māh
manzūr yaañ thī mad.h-e-gulū-e-shah-e-umam
yaad aa ga.ī magar ye hadīs-e-ġham-o-alam
thā jo sutūñ ki rukn-e-risālat kā takiya-gāh
kursī bhī us kī pusht kī thī DhūñDhtī panāh
as.hāb-e-ḳhās gird the anjum kī tarah sab
tābāñ thā biich meñ vo mah-e-hāshmī-laqab
gesū the vo mufassir-e-vallail-izā-sajā
ruḳh se ayaañ the ma.anī-e-vashshams-o-va-zzuhā
pahlū meñ bādshāh ke thā jalva-gar vazīr
sardār-e-dīñ alī-e-valī ḳhalq kā amiir
masrūf-e-vāz-o-pand the sultān-e-mashriqain
jo ghar se nikle khelte zohrā ke nuur ain
vo gore gore chehroñ pe zulfeñ idhar udhar
aḳhtar se vo chamakte hue kaan ke guhar
masjid meñ aa.e hañste hue jab vo gul-badan
ḳhushbū se sehan-e-masjid-e-jāme banā chaman
beToñ ko thā alī kā ishāra ki baiTh jaao
lāzim nahīñ ki vaaz meñ naanā ko tum satāo
bole hasan ki vaah hameñ aur kareñ na pyaar
iqrār ke chuke haiñ shahanshāh-e-nām-dār
bhaa.ī se tab kahā ye hasan ne ba-iltifāt
be-vaj.h ham se rūThe ho tum ai niko-sifāt
ye sun ke muñh alī kā lage dekhne rasūl
hañs kar kahā ye donoñ haiñ mere chaman ke phuul
shabbar se phir ishāra kiyā ho ke be-qarār
ġhussa na khaao pahle tumhīñ ko kareñge pyaar