añdhere meñ chalā hai kārvān-e-be-jaras koī

buland-o-past koī hai na us kā pesh-o-pas koī

kuchh āvāzeñ haiñ

āvāzoñ ke dekho jism bhī haiñ pairahan bhī haiñ

koī āvāz kyuuñ aatī nahīñ

murdoñ pe shāyad chal rahe haiñ ham

koī Tāñkā kahīñ TuuTā hai sannāTe ke hoñToñ kā

ye koī chīḳh hai samjho kahīñ par mar gayā koī

koī sūraj kisī kī āstīñ se phir hameñ āvāz detā hai

aur is āvāz se had-e-nazar tak raushnī sī hai

ham apnī apnī zulmat apnī apnī raushnī ḳhud haiñ

luTe jitnā koī us ke liye itnā añdherā hai!