mere shānoñ pe tirā sar thā nigāheñ namnāk
ab to ik yaad sī baaqī hai so vo bhī kyā hai
ghar gayā zehn ġham-e-zīst ke andāzoñ meñ
har hathelī pe dhare soch rahā huuñ baiThā
kaash us vaqt koī pīr-e-ḳhamīda aa kar
kisī āzurda tabī.at kā fasāna kahtā
ik dhuñdlakā sā hai dam toḌ chukā hai sūraj
din ke dāman pe haiñ dhabbe se riyā-kārī ke
aur maġhrib kī fanā-gāh meñ phailā huā ḳhuuñ
dabtā jaatā hai siyāhī kī tahoñ ke nīche
duur tālāb ke nazdīk vo sūkhī sī babūl
chand TuuTe hue vīrān makānoñ se pare
haath phailā.e barahna sī khaḌī hai ḳhāmosh
jaise ġhurbat meñ musāfir ko sahārā na mile
us ke pīchhe se jhijaktā huā ik gol sā chāñd
ubhrā be-nūr shuāoñ ke safīne ko liye
maiñ abhī soch rahā huuñ ki agar tū mil jaa.e
zindagī-go hai girāñ-bār pa itnī na rahe
chand aañsū ġham-e-gītī ke liye chand nafas
ek ghaav hai jise yuuñ hī siye jaate haiñ
maiñ agar jī bhī rahā huuñ to ta.ajjub kyā hai
mujh se lākhoñ haiñ jo be-sūd jiye jaate haiñ
koī markaz hī nahīñ mere taḳhayyul ke liye
is se kyā fā.eda jiite rahe aur jī na sake
ab irāda hai ki patthar ke sanam pūjūñgā
taaki ghabrā.ūñ to Takrā bhī sakūñ mar bhī sakūñ
aise insānoñ se patthar ke sanam achchhe haiñ
un ke qadmoñ pe machaltā ho damaktā huā ḳhuuñ
aur vo merī mohabbat pe kabhī hañs na sakeñ
maiñ bhī be-rañg nigāhoñ kī shikāyat na karūñ
yā kahīñ gosha-e-ahrām ke sannāTe meñ
jā ke ḳhvābīda farā.īn se itnā pūchhūñ
har zamāne meñ ka.ī the ki ḳhudā ek hī thā
ab to itne haiñ ki hairān huuñ kis ko pūjūñ
ab to maġhrib kī fanā-gāh meñ vo sog nahīñ
aks tahrīr hai ik raat kā halkā halkā
aur pur-soz dhundalke se vahī gol sā chāñd
apnī be-nūr shuāoñ kā safīna khetā
ubhrā namnāk nigāhoñ se mujhe taktā huā
jaise ghul kar mire aañsū meñ badal jā.egā
haath phailā.e udhar dekh rahī hai vo babūl
sochtī hogī koī mujh sā hai ye bhī tanhā
ā.īna ban ke shab-o-roz takā kartā hai
kaisā tālāb hai jo us ko harā kar na sakā
yuuñ guzāre se guzar jā.eñge din apne bhī
par ye hasrat hī rahegī ki guzāre na ga.e
ḳhuun pī pī ke pilā kartī hai añgūr kī bel
gar yahī rañg-e-tamannā thā chalo yūñhī sahī
ḳhuun piitī rahī baḌhtī rahī koñpal koñpal
chhāñv tāroñ kī shagūfoñ ko numū detī rahī
narm shāḳhoñ ko thapakte rahe ayyām ke haath
yūñhī din biit ga.e sub.h huī shaam huī
ab magar yaad nahīñ kyā thā ma.āl-e-ummīd
ek tahrīr hai halkī sī lahū kī baaqī
bel phaltī hai to kāñToñ ko chhupā letī hai
zindagī apnī pareshāñ thī pareshāñ hī rahī
chāhtā ye thā mire zaḳhm ke añgūr bañdheñ
ye na chāhā thā mirā jām-e-tahī rah jaa.e
haath phailā.e udhar dekh rahī hai vo babūl
sochtī hogī koī mujh sā hai ye bhī tanhā
ghir gayā zehn ġham-e-zīst ke andāzoñ meñ
kaisā tālāb hai jo us ko harā kar na sakā
kaash is vaqt koī pīr-e-ḳhamīda aa kar
mere shānoñ ko thapaktā ġham-e-tanhā.ī meñ