hai ab tak sehr sā chhāyā tirī jādū-navā.ī kā
dil-e-urdu pe ab tak daaġh hai terī judā.ī kā
zabān-e-sher se ab bhī tirī āvāz suntā huuñ
jo niklā thā tirī mizrāb se vo saaz suntā huuñ
taġhazzul ko tirī rañgīñ navā.eñ yaad haiñ ab tak
tire naġhmoñ se dil kī bastiyāñ ābād haiñ ab tak
diloñ ko ab bhī chamkātī hai sham-e-ārzū terī
lab-e-tahrīr par ab tak hai shīrīñ guftugū terī
tire jazbāt meñ ab tak sadāqat jagmagātī hai
tirī guftār kī shoḳhī diloñ ko gudgudātī hai
niyāz-o-nāz kī mahfil meñ terā naam rahtā hai
tire mastoñ ke aage ab bhī terā jaam rahtā hai
tirī rañgīniyoñ meñ sādgī kī shaan hotī hai
tire afkār kī duniyā bhī sheristān hotī thī
tire naġhme sukūñ-parvar the arbāb-e-mohabbat ke
sadā be-dāġh dekhā hai tire dāmān-e-fitrat
chhalaktī thiiñ tire dil kī adā.eñ bhī nigāhoñ se
balā kā dard hotā thā tirī ḳhāmosh aahoñ meñ
tire lab par vahī aatā thā jo har dil meñ hotā thā
vo ban jaatā thā shā.ir jo tirī mahfil meñ hotā thā
fasīh-ul-mulk thā jān-e-fasāhat terī bāteñ thiiñ
qayāmat jis pe dam de vo qayāmat terī bāteñ thiiñ
tirī guftār meñ ham ne mazāq-e-zindagī dekhā
tire sāzoñ meñ dil ke soz kā mafhūm thā goyā
tirī hastī ko rāz-e-do-jahāñ ma.alūm thā goyā
farishtoñ kā taqaddus thā tire husn-e-takallum meñ
tire aañsū meñ soz-e-dil thā yā sho.ala thā shabnam meñ
zabāñ ko hūr-o-ġhilmāñ ne tirī kausar se dhoyā thā
ḳhudā ne bahr-e-ulfat meñ tirī ulfat ko khoyā thā
anādil bhī baḌhe terī taraf dāman ko phailā.e
mohabbat kī zabāñ se tū ne jis dam phuul barsā.e
fazā ko kar diyā rañgīn apnī naġhma-ḳhvānī se
guloñ meñ phūñk dī rūh-e-tabassum gul-fishānī se
tire naġhme bahe jab nik.hat-e-gul ke safīne meñ
to laale ne biThāyā lā ke tujh ko apne siine meñ
har ik dard-āshnā dil meñ rakhā tujh ko mohabbat ne
zabāñ kā lutf thā ai bulbul-e-hindustāñ tujh se
payambar thā suḳhan kā to tire naġhmoñ pe jūmeñge
ham apne dīda-e-dil se tirī turbat ko chūmeñge

raheñge hashr tak baaqī tire naġhme nahīñ faanī
bajā hai tujh ko kahte haiñ jo ham tilmīz-e-rahmānī
tire jazbāt ke pur-kaif sailāboñ meñ bahte haiñ
haqīqat-āshnā tujh ko jahāñ-ustād kahte haiñ
jahān-e-ārzū meñ ab bhī hāl-o-qāl terā hai
suḳhan kī mumlikat meñ aaj tak iqbāl terā hai
suḳhan-fahmoñ ke dil meñ ab bhī terī yaad baaqī hai
ġhazal ke mai-kada jab tak hai qaa.em tū hī saaqī hai
dakan meñ zauq thā zauq-e-suḳhan mahbūb thā tujh ko
hameñ ma.alūm hai mulk-e-dakan mahbūb thā tujh ko
dakan ko aane vaale bas gayā mulk-e-dakan meñ tū
ki bulbul thā banāyā āshiyāñ apnā chaman meñ tū
qayāmat tak na bhūleñge tujhe tere vatan vaale
kahīñ bulbul ke naġhme bhuul jaate haiñ chaman vaale
dil-e-betāb ke barbat pe naġhma dard kā gaayā
taġhazzul se hamārī mahfiloñ ko tū ne garmāyā
tire ehsān ke gun gā.egā josh-e-vafā-koshī
dakan vāloñ kī fitrat meñ nahīñ ehsāñ-frāmoshī
kaleja thaam kar apnā tire ash.ār gā.eñge
dakan kī vādiyoñ meñ ham tire naġhme basā.eñge
aqīdat-āfrīñ gul terī turbat par chaḌhā.eñge
tire har sher ko ham apnī āñkhoñ se lagā.eñge