ai mire murġhe mire sarmāya-e-taskīn-e-jāñ
terī furqat meñ hai be-raunaq mirā saarā makāñ
tujh ko laayā thā karachi se ki pālūñgā tujhe
mashriqī ādāb ke sāñche meñ Dhālūñgā tujhe
tere ġhamze zindagānī bhar na bhūleñge mujhe
phuul sī kalġhī mulā.em par na bhūleñge mujhe
maiñ vabā-e-ām se tujh ko bachātā rah gayā
tujh ko kitne qīmtī sharbat pilātā rah gayā
terī sūrat jab bhī yaad aa.ī jigar taḌpā ga.ī
terī furqat meñ mire paañv meñ kal moch aa ga.ī
dāstān-e-murġh ik dard-e-nihāñ sābit huī
ye pareshānī nashāt-e-dushmanāñ sābit huī
ai mire murġhe tumhāre tazkire hoñge yahāñ
maiñ banā dūñgā tumhārī har adā ko jāvedāñ