zauq-e-takallum par urdu ne raah anokhī kholī hai
rañg kī gahrā.ī naapī hai phuul kī ḳhushbū tolī hai
garmā.e tahzīb kī mahfil chamkāyā afsāne ko
rañg bikherā āñchal āñchal ruup kā maan baḌhāne ko
'mīr' ne dil kī dhaḌkan dī 'iqbāl' ne fikr kā nuur diyā
'ġhālib' ne āġhosh ko is kī husn-e-qarīb-o-dūr diyā
krishn ke afsānoñ kā jaadū diloñ kā saudā kartā hai
'jigar' kā naġhma āñkhoñ hī āñkhoñ meñ ishāra kartā hai
giit 'firāq' ke jhilmil jhilmil karte haiñ mash.al kī tarah
hurmat kī lai sāya-fagan hai sāvan ke bādal kī tarah