kis tarah ret ke samundar meñ

kashtī-e-zīst hai ravāñ socho

sun ke bād-e-sabā kī sargoshī

kyuuñ laraztī haiñ pattiyāñ socho

pattharoñ kī panāh meñ kyuuñ hai

ā.ina-sāz kī dukāñ socho

asl sar-chashma-e-vafā kyā hai

vaj.h-e-be-mehrī-e-butāñ socho

zauq-e-ta.amīr kyuuñ nahīñ miTtā

kyuuñ ujaḌtī haiñ bastiyāñ socho

fikr-e-suqrāt hai ki zahr kā ghūñT

bā.is-e-umr-e-jāvedāñ socho

log ma.anī tarāsh hī leñge

koī be-rabt dāstāñ socho