kahīñ gulāb kī kaliyoñ meñ muskurāte haiñ
kahīñ hujūm meñ bachchoñ ke paa.e jaate haiñ
nazar se chhup ke bhī vo dil ke paas rahte haiñ
maiñ tum se duur nahīñ huuñ vo ham se kahte haiñ
vo chāchā nehru jo bachchoñ se pyaar karte the
na.e zamāne kā jo intizār karte the
nayā zamāna jo duniyā ko raushnī baḳhshe
har aadmī ko na.ī ek zindagī baḳhshe
vo jis meñ amn-o-mohabbat kā bol baalā ho
charāg-e-ilm se har samt ik ujālā ho
amiir jis meñ na chūseñ lahū ġharīboñ kā
nasīb jis meñ chamak jaa.e bad-nasīboñ kā
ham un ke ḳhvāb haqīqat banā ke chhoḌeñge
ki chāchā nehru se rishta kabhī na toḌeñge