paapā miyāñ zamāne meñ kyā naam kar ga.e
tārīḳh-e-hind meñ vo nayā kaam kar ga.e
mahrūm-e-ilm-o-fan thiiñ musalmāñ thiiñ laḌkiyāñ
māhaul kī ghuTan se pareshāñ thiiñ laḌkiyāñ
ta.alīm auratoñ ko mile ye gunāh thā
kyā kahiye kaisā qaum kā hāl-e-tabāh thā
paapā miyāñ ke azm ne ye kar dikhāyā kaam
jis ko sabhī samajh rahe the ik ḳhayāl-e-ḳhām
kyā kyā muḳhālifat kā na tūfān sah ga.e
vo kar dikhāyā log sabhī dañg rah ga.e
begam bhī jān-o-dil se thiiñ un kī rafīq-e-kār
ehsān laḌkiyoñ pe haiñ un ke bhī be-shumār
paudā jo kal thā ab shajar-e-sāya-dār hai
paapā miyāñ ke baaġh meñ kaisī bahār hai
phūlā-phalā rahe ye gulistān-e-ilm-o-fan
qaa.em rahe zamāne meñ paapā kī anjuman