maiñ ki mai-ḳhāna-e-ulfat kā purānā mai-ḳhvār
mahfil-e-husn kā ik mutrib-e-shīrīñ-guftār
kitne dil-kash mire but-ḳhān-e-īmāñ ke sanam
vo kalīsāoñ ke aahū vo gazālān-e-haram
maujzan hai mai-e-ishrat mire paimānoñ meñ
yaas kā dard hai kam-tar mire afsānoñ meñ
mere afkār meñ mahtāb kī tal.at ġhaltāñ
merī guftār meñ hai sub.h kī nuzhat ġhaltāñ
laakh majbūr huuñ maiñ zauq-e-ḳhud-ārā.ī se
dil hai bezār ab is ishrat-e-tanhā.ī se
kyuuñ na chāhūñ ki har ik haath meñ paimāna ho
yaas o mahrūmī o majbūrī ik afsāna ho
ab ye armāñ ki badal jaa.e jahāñ kā dastūr
ek ik aañkh meñ ho aish o farāġhat kā surūr