mehnat se ye maanā chuur haiñ ham
ārām se kosoñ duur haiñ ham
go aafat o ġham ke maare haiñ
ham ḳhaak nahīñ haiñ taare haiñ
banñe kī tamannā rakhte haiñ
miTne kā kaleja rakhte haiñ
har chand ki haiñ adbār meñ ham
kahte haiñ khule bāzār meñ ham
jis samt baḌhā dete haiñ qadam
jhuk jaate haiñ shāhoñ ke parcham
go jaan pe lākhoñ baar banī
kar guzre magar jo jī meñ Thanī
ham kyā haiñ kabhī dikhlā deñge
ham nazm-e-kuhan ko Dhā deñge
ham jism meñ tāqat rakhte haiñ
sīnoñ meñ harārat rakhte haiñ
jis roz baġhāvat kar deñge
duniyā meñ qayāmat kar deñge
ham qabza kareñge daftar par
ham vaar kareñge qaisar par