mirī hayāt ye hai aur ye tumhārī qazā
ziyāda kis se kahūñ aur kis ko kam bolo
tumhārā daur thā ghar meñ bahār hañstī thī
abhī to dar pe faqat ranj-o-ġham kī dastak hai
hazāroñ qarz the mujh par tumhārī ulfat ke
mujhe vo qarz chukāne kā mauqa to dete
baḌe sukūn se tum so ga.e vahāñ jā kar
ye kaise niiñd tumheñ aa ga.ī na.e ghar meñ
maiñ bojh kāñdhoñ pe aise uThā ke chaltā huuñ
tumhārā jaise janāza uThā ke chaltā thā
tumhārī sham-e-tamannā bas ek raat bujhī
charāġh merī tavaqqo.a ke roz bujhte haiñ
maiñ jab bhī chhūtā huuñ apne badan kī miTTī ko
to lams phir usī ThanDe badan kā hotā hai
bahut tavīl kahānī hai merī hastī kī
tumhārī maut to ik muḳhtasar fasāna hai
maiñ koī raah huuñ tum raah dekhne vaale
ki muntazir to marā par na intizār marā