pyaar kī āḳhirī pūñjī bhī luTā aayā huuñ

apnī hastī ko bhī lagtā hai miTā aayā huuñ

tū ne likhkhā thā jalā duuñ maiñ tirī tahrīreñ

tū ne chāhā thā jalā duuñ maiñ tirī tasvīreñ

tere ḳhushbū meñ base ḳhat maiñ jalātā kaise

pyaar meñ Duube hue ḳhat maiñ jalātā kaise

jin ko duniyā kī nigāhoñ se chhupā.e rakkhā

jin ko ik umr kaleje se lagā.e rakkhā

jin kā har lafz mujhe yaad hai paanī kī tarah

yaad the mujh ko jo paiġhām-e-zabānī kī tarah

tū ne duniyā kī nigāhoñ se jo bach kar likkhe

sāl-hā-sāl mire naam barābar likkhe

tere rūmāl tire ḳhat tire chhalle bhī ga.e

terī tasvīreñ tire shoḳh lifāfe bhī ga.e

kitnā bechain unheñ lene ko gañgā-jal thā

jo bhī dhārā thā unhīñ ke liye vo bekal thā