mere hāthoñ se merī chitā ban ga.ī
mere kāñdhoñ pe merā janāza uThā
mere bāzār kūche mire bām-o-dar
merī nādāriyoñ se sajā.e ga.e
merī taqdīr kā jo bhī ḳhāka banā
piile mausam ke pattoñ pe likkhā gayā
mere alfāz ma.anī kī talvār se
sar-burīda hue gungunāte rahe
mujh se merī tamannā ke gul chhīn kar
zard mausam ne jashn-e-bahārāñ kiyā
mere sarsabz jañgal ujāḌe ga.e
merī jhīloñ meñ ajgar basā.e ga.e