duniyā to ye kahtī hai bahut mujh meñ hunar hai

maiñ chāhūñ to duniyā ko chaman-zār banā duuñ

aa jaatā hai in bātoñ meñ duniyā ke mirā dil

juT jaatā huuñ maiñ kaam meñ jī-jān lagā kar

ye dekh ke kuchh roz to chup rahtī hai duniyā

de jaatī hai nāgāh magar mujh ko daġhā bhī

duniyā ko nazar aate haiñ nā-vaqt bhī mujh meñ

vo aib ki phir kuchh mujhe karne nahīñ detī

duniyā to ye kahtī hai bahut mujh meñ hunar hai

maiñ chāhūñ to duniyā ko chaman-zār banā duuñ