ik pīpal ke nīche maiñ ne apnī khaaT bichhā.ī
leT gayā maiñ khaaT pe lekin niiñd na mujh ko aa.ī
pīpal ke pattoñ ko ginte karte un par ġhaur
pīpal kī shāḳhoñ ko takte biit gayā ik daur
chale havā to Daalī Daalī lachak lachak bal khaa.e
ruke havā to sādhū ban kar dhyān kā diip jalā.e
pīpal kī shāḳhoñ par baiThe kuchh panchhī sustā.eñ
bāhar se kuchh aane vaale ik kohrām machā.eñ
pīpal kyā hai jogī kā be-darsā ik asthān
jhoñke patte panchhī insāñ sab is ke mehmān