vo chalātā hai daftar-e-shādī

dost aisā bhī ik hamārā hai

fees letā hai dil milāne kī

aur isī kaam par ''guzārā'' hai

koī shādī baġhair mar jaa.e

ye bhalā kab use gavārā hai

aqd-e-sānī kī jin ko ḳhvāhish ho

un kī ummīd kā sitārā hai

jin ko rishta kahīñ na miltā ho

un kā ye āḳhirī sahārā hai

sochtā huuñ ki hai vo ḳhush-qismat

yā haqīqat meñ ġham kā maarā hai

an-ginat shādiyāñ karā Dālīñ

aur ḳhud aaj tak kañvārā hai