simaTte phailte paiham sulagte aur dhuñdlāte
ufuq jab pai-ba-pai ubhreñ ufuq jab pai-ba-pai Dūbeñ
ufuq mehrāb-dar-mehrāb apne dvaar phailā.e
ta.āqub ke ishāre barq ban kar kauñd jaate haiñ
zarā sī baat lekin ābgīne TuuT jaate haiñ
zarā sī baat pahroñ dil dikhātī hai satātī hai
vo dekho po phaTī añdhiyāre jādoñ ke shagāfoñ se
ham is ko marhamat kā naam dete haiñ har ik shikva
alāvoñ ke qarīñ baiThe hue kitnī ḳhunuk shāmeñ
guzar jaatī haiñ jaise ḳhvāb guzre dil taḌaptā hai
magar ye dā.era-dar-dā.era sachchā.iyāñ tauba
hamesha raah meñ aatī raheñ tanhā.iyāñ dene
asāsa rahguzāroñ kā thakan avval thakan āḳhir
nazāre chashm-e-bīnā meñ jo aañsū ban ke rahte haiñ
ye ġham kitnā ġhanīmat hai ye ġham-e-hastī kī qīmat hai
ki ham is ko sunāne aur sunñe meñ bahal jaa.eñ
ufuq ke us taraf aur is taraf bikhrā huā imkāñ
jise hamrāh kahte the vo ik sapnā thā saudā thā