zikr nahīñ ye farzānoñ kā
qissa hai ik dīvānoñ kā
masco, paris aur london meñ
dekhe maiñ ne tiin sharābī
nashsha-e-mai kā taaj jabīñ par
fikr falak par paañv zamīñ par
ek ne shāyad whiskey pī thī
dūsre ne shampain kī botal
maiñ ne un nāzuk lamhoñ meñ
rūh-e-bashar ko uryāñ dekhā
riñd bahut the lekin vo sab
apne nashe meñ kho.e hue the
itne meñ ik qāmat-e-ra.anā
qadam qadam par phuul khilātā
is nāzuk lamhe meñ maiñ ne
hirs-o-havas ko raqsāñ dekhā
zikr nahīñ ye farzānoñ kā
qissa hai ik dīvānoñ kā
us mahfil meñ sab hī kuchh thā
saaqī bhī aur pīr-e-muġhāñ bhī
zikr nahīñ ye farzānoñ kā
qissa hai ik dīvānoñ kā
dosh-e-havā par tārīkī ne
zulfoñ ke ḳham khol diye the
ḳhush-fikroñ kā abr-e-bahārāñ
jhuum paḌā thā mai-ḳhānoñ par
chehroñ kī raushan qindīleñ
bāñhoñ kī dil-kash mehrābeñ
nashsha-e-mai ke sar par lekin
aql o ḳhirad kā taaj dharā thā
aur sharābī mez se uTh kar
raqs ke halqoñ se Takrātā
merī zabāñ thī urdu, hindī
us kī zabāñ thī ruusī lekin
ab jo maiñ ne muḌ kar dekhā
jashn na thā ye dīvānoñ kā
maiñ ne is nāzuk lamhe meñ
rūh-e-bashar ko nāzāñ dekhā