phuul kāġhaz ke haiñ ḳhushbū se bahut duur haiñ ye
merī maañ to unheñ be-kār chunā kartī hai
mere malbūs mohabbat kā jo paivand bane
mujh ko us reshmī kapḌe kī zarūrat kyā hai
apne hī zauq-e-tabassum meñ giraftār-o-asīr
zard chehre pe mile ġhāza-e-gul-e-rañg kī dhuul
kyā baḌhā.eñge kabhī zīnat-e-dāmān-e-ḳhulūs
ḳhārzāroñ se ulajhnā jinheñ aatā hī na ho
rāt-bhar jaltā rahe chāhiye mujh ko vo charāġh
phuul kāġhaz ke haiñ kuchh der meñ jal jā.eñge
kyā milegā mujhe us gul ke tabassum se kabhī
jis ke chehre pe ho rañgīn sharārat kī lakīr
aise gulshan meñ kahāñ rāt-kī-rānī mahke
jis ke har goshe se katrā ke guzartī ho bahār
dil meñ ik vaqt-e-tarab-nāk kā armān liye
ḳhud ko yuuñ vaqf-e-ġham-o-gardish-e-hālāt na kar
phuul kāġhaz ke haiñ ḳhushbū se bahut duur haiñ ye
merī maañ tū unheñ be-kār chunā kartī hai