chaap qadmoñ kī suno raat ke taare na gino
koī aa.egā ba-har-hāl zarūr aa.egā
yās-o-hirmāñ ke añdheroñ meñ sitāre bhar do
dil ke ḳhvābīda darīchoñ se kaho aañkh maleñ
le ke ākāsh pe aatī hai kise kāhkashāñ
chāñd hai yā kisī kamsin ke ḳhad-o-ḳhāl kā nuur
oḌh kar chādar-e-sīmāb koī zohra-jamāl
jagmagāte hue tāroñ se utartī hai zarūr
chaap qadmoñ kī suno raat ke taare na gino
koī aa.egā ba-har-hāl zarūr aa.egā