jahāñ bhī chhānūñ ghanī ho qayām karte chalo
adab jahāñ bhī mile ehtirām karte chalo
zabāñ tasalsul-e-tārīḳh-e-zindagānī hai
zabān manāzil-e-tahzīb kī kahānī hai
zamīñ kā husn hai khetoñ kī tāzgī hai zabāñ
rahaT kī lai hai to panghaT kī rāgnī hai zabāñ
zabāñ machaltī hai miTTī pe chahchahoñ kī tarah
zabāñ nikaltī hai chilman se zamzamoñ kī tarah
zabāñ laboñ kā salīqa diloñ kā nuur bhī hai
zabān qaum kī izzat bhī hai ġhurūr bhī hai