suniye ik nā-āqibat-andesh kī fariyād hai

kah rahā hai vo mujhe apnī javānī yaad hai

vo bhī kyā din the ki jab ye muflisī chhā.ī na thī

''āshiqī qaid-e-sharī.at meñ'' abhī aa.ī na thī

kyā ḳhatā merī ki jo bachcha huā juḌvāñ huā

aur ma.a ham-zād aajiz hī ke ghar mehmāñ huā

ho ga.e haiñ ek darjan aaj tak laḳht-e-jigar

ek in meñ referē gyārah khilāḌī haiñ magar

jā ke pahle ke liye moTī sifārish lā.ūñgā

mauqa.a-be-mauqa.a a.izza ko bahut dauḌā.ūñgā

dūsrā bīmār hai lā.ūñgā maiñ us kī davā

DhūñDhtā huuñ tīsare ke dāḳhle ko madrasa

pāñchvāñ hai aur chhaTā hai aur patañgeñ aur Dor

sātvāñ hai, āTHvāñ hai aur navāñ karte haiñ zor

haiñ jo dasvīñ, gyārahvīñ, donoñ haiñ kandhoñ par savār

ye dilā do vo dilā do kah rahe haiñ baar baar

ghar meñ motor bhī barā.e-bār-bardārī nahīñ

saath le jaane meñ bachchoñ ke ba-juz-ḳhvārī nahīñ

baat sach ye hai ki ham the jis zamāne meñ javāñ

ḳhāndānī qasam kī mansūba-bandī thī kahāñ