daadī kā pandān Thikāne lagā diyā

phir aaj is sharīr ne zamzam girā diyā

daadā ne āsmān kī jānib nigāh kī

godī meñ jam gayā to musallā uThā diyā

chalne lagā to saa.e farishtoñ ne kar diye

pariyoñ ne rāste meñ paroñ ko bichhā diyā

yuuñ hañs diyā ki jaise jazā baañT dī ga.ī

yuuñ lab-kushā huā ki gulistāñ banā diyā

sab iltijā.eñ us ke liye sirf ho ga.iiñ

rakh lī ḳhudā ne laaj diyā to sivā diyā