ham ḳhizāñ kī ġhudūd se chal kar
ḳhud december kī kokh tak aa.e
sūrajoñ ne hamāre hoñToñ par
apne hoñToñ kā shahd Tapkāyā
barf bistar banī hamāre liye
aur dozaḳh ke surḳh resham se
zard shiryān ko dhueñ se bharā
phephaḌoñ par siyāh raakh malī
lorkā ko kalā.ī par bāñdhā
ho-chi-minh ko niyām meñ rakhā
dard ko falsafe kī lorī dī
zaḳhm par shā.irī kā phāhā rakkhā
ham ne fir.aun kā qasīda likhā
ham ne kuufe meñ marsiye beche
zindagī kī lagan nahīñ ham ko
zindagī kī hameñ thakan bhī nahīñ