tere hoñToñ pe tabassum kī vo halkī sī lakīr
mere taḳh.īl meñ rah rah ke jhalak uThtī hai
tere pairāhan-e-rañgīñ kī junūñ-ḳhez mahak
ḳhvāb ban ban ke mire zehn meñ lahrātī hai
maiñ sulagte hue rāzoñ ko ayaañ to kar duuñ
lekin un rāzoñ kī tash.hīr se jī Dartā hai
terī sāñsoñ kī thakan terī nigāhoñ kā sukūt
dar-haqīqat koī rañgīn sharārat hī na ho
sochtā huuñ ki tujhe mil ke maiñ jis soch meñ huuñ
pahle us soch kā maqsūm samajh luuñ to kahūñ
kahīñ aisā na ho paañv mire tharrā jaa.eñ
aur tirī marmarīñ bāñhoñ kā sahārā na mile