ye mahloñ ye taḳhtoñ ye tājoñ kī duniyā
ye insāñ ke dushman samājoñ kī duniyā
har ik jism ghāyal har ik ruuh pyāsī
nigāhoñ meñ uljhan diloñ meñ udāsī
yahāñ ik khilaunā hai insāñ kī hastī
ye bastī hai murda-parastoñ kī bastī
javānī bhaTaktī hai bad-kār ban kar
javāñ jism sajte haiñ bāzār ban kar
ye duniyā jahāñ aadmī kuchh nahīñ hai
vafā kuchh nahīñ dostī kuchh nahīñ hai
jalā do ise phūñk Daalo ye duniyā
mire sāmne se haTā lo ye duniyā