merā dukh kuoñ ki tarā.iyoñ meñ utar gayā hai

maiñ use khīñch kar nikāl lūñgā

ham ne ek hī ghūñT se pyaas bujhā.ī

jo tum ne halq ke andar se chakhā

tum hamārī taraf ruḳh kar ke kitāb dekhte

aur taḳhta-e-siyāh kī taraf ruḳh kar ke

mujhe tumhāre kūlhoñ kī ma.asūmiyat maar Dālegī

gardan se nīche

tumhārī āñkhoñ meñ mere liye

ek ḳhair-maqadmī rāsta bichhā thā

tumhārī pusht par lipTā saañp

mere siine par reñg rahā hai

zindagī maiñ ne bhiik meñ vasūl ki

ab vo mere gullak meñ gal rahī hai

tum use

apnī zabān kī nok par utaar kar thuuk denā