itnī muddat dil-e-āvāra kahāñ thā ki tujhe

apne hī ghar ke dar-o-bām bhulā baiThe haiñ

to samajhtā thā ki ye dar-badarī kā aalam

duur desoñ kī ināyat thā so ab ḳhatm huā

ab jo tū shahr-e-nigārāñ meñ qadam rakkhegā

har taraf khilte chale jā.eñge chehroñ ke gulāb

jab bhī gā.egī koī ġhairat-e-nāhīd ġhazal

sab ko aa.egā nazar sho.ala-e-āvāz meñ tū

maa.eñ rakkheñgī tire naam pe aulād kā naam

baap beToñ ke liye terī bayāzeñ leñge

log ulfat ke khilaune liye bachchoñ kī tarah

kal ke rūThe hue yāroñ ko manā lā.eñge

lekin aisā nahīñ aisā nahīñ ai dil ai dil

ye tirā des ye tere dar-o-dīvār nahīñ

sar kisī kā bhī dikhā.ī nahīñ detā hai yahāñ

jism hī jism haiñ dastāreñ hī dastāreñ haiñ

ab na tiflāñ ko ḳhabar hai kisī dīvāne kī

aur na āvāz ki ''o chaak garebāñ vāle''