mire ġhanīm ne mujh ko payām bhejā hai
ki halqa-zan haiñ mire gird lashkarī us ke
vo barq lahar bujhā dī ga.ī hai jis kī tapish
vajūd-e-ḳhāk meñ ātish-fishāñ jagātī thī
tamām suufī o sālik sabhī shuyūḳh o imaam
umīd-e-lutf pe aivān-e-kaj-kulāh meñ haiñ
tum ahl-e-harf ki pindār ke sanā-gar the
vo āsmān-e-hunar ke nujūm sāmne haiñ
qalandarān-e-vafā kī asaas to dekho
tumhāre saath hai kaun ās-pās to dekho
ye shart-nāma jo dekhā to elchī se kahā
use ḳhabar nahīñ tārīḳh kyā sikhātī hai
so ye javāb hai merā mire adū ke liye
ki mujh ko hirs-e-karam hai na ḳhauf-e-ḳhamyāza
mirā qalam nahīñ kirdār us muhāfiz kā
jo apne shahr ko mahsūr kar ke naaz kare
mirā qalam nahīñ auzār us naqab-zan kā
jo apne ghar kī hī chhat meñ shigāf Dāltā hai
mirā qalam nahīñ tasbīh us maballiġh kī
jo bandagī kā bhī har dam hisāb rakhtā hai
mirā qalam to amānat hai mere logoñ kī
mirā qalam to adālat mire zamīr kī hai
maiñ kaT girūñ ki salāmat rahūñ yaqīñ hai mujhe
ki ye hisār-e-sitam koī to girā.egā
sarisht-e-ishq ne uftādgī nahīñ paa.ī
tū qadd-e-sarv na biinī o sāya-paimā.ī