na rakh niyām meñ rahne de be-niyām abhī
tū is ko haath meñ kuchh der aur thaam abhī
abhī to chhā.ī huī hai ufuq pe ġham kī ghaTā
abhī to shoa.la-fishāñ hai himaliya kī fazā
abhī to jam.a hai sarhad pe lashkar-e-aġhyār
abhī to āñkheñ dikhātā hai ġhāsib-e-ġhaddār
koī kalām nahīñ hai tirī shujā.at meñ
na aa.ī paañv meñ laġhzish hazār aafat meñ
uThe jo fitna-e-tāza use dabānā hai
sitam-tarāz ko maidān se bhagāna hai