maiñ ne sochā thā ki is baar tumhārī bāheñ
merī gardan meñ ba-sad-shauq hamā.il hoñgī
maiñ ne sochā thā ki is baar nigāhoñ ke salām
ā.eñge aur ba-andāz-e-digar ā.eñge
maiñ ne sochā thā ki is baar tumhārī sāñseñ
merī bahkī huī sāñsoñ se lipaT jā.eñgī
maiñ ne sochā thā ki is baar tumhārā paikar
mere be-ḳhvāb darīchoñ ko sulā jā.egā
maiñ ne sochā thā ki is baar mire āñgan meñ
rañg bikhreñge umīdoñ kī dhanak TūTegī
maiñ ne sochā thā ki is baar ba-īñ sūrat-e-hāl
mere darvāze pe shahnā.iyāñ sab dekheñge
maiñ ne sochā thā ki is baar mohabbat ke liye
gungunāte hue jazboñ kī barāt aa.egī
tum mire ishq kī taqdīr banogī is baar
jiit jā.egā mirā josh-e-junūñ sochā thā