sard maidānoñ pe shabnam saḳht

sukḌī sha-rāhoñ munjamid galiyoñ pe

jaalā niiñd kā

masrūf logoñ be-irāda ghūmte āvāra

kā hujūm be-dimāġh ab tham gayā hai

ranDiyoñ zanḳhoñ uchakkoñ jeb katroñ lūtiyoñ

kī fauj istimāl karda jism ke mānind Dhīlī

paḌ ga.ī hai

sansanātī raushnī havāoñ kī phisaltī

god meñ chup

ūñghtī hai farsh aur dīvār o dar

fuT paath

khambe

dhundlī mehrābeñ

dukānoñ ke siyah vīrān-zīne

sab ke nañge jism meñ shab

nam havā kī sūiyāñ be-ḳhauf

utartī kūdtī dhūmeñ machātī haiñ

kuchh shikasta taḳhtoñ ke pīchhe ka.ī

māsūm jāneñ haiñ

ḳhvāb kam-ḳhvābī meñ larzāñ

baal o par meñ sard-nishtar

baañs kī halkī akahrī be-hifāzat

Tokarī meñ

darjanoñ majbūr taa.ir

zer-e-par minqār muñh Dhāñpe ḳhamoshī ke samundar-e-be-nishāñ meñ

ġharq bāzū-basta chup

maḳhlūq ḳhudā jo gol kaalī gahrī āñkhoñ ke

na jaane kaun se manzar meñ gum hai