tū chalī jā ki mujhe terī zarūrat bhī nahīñ
maiñ shab-o-roz kī miTTī se dobāra bhī janam le lūñgā
maiñ sipāhī to nahīñ phir bhī laḌī haiñ ka.ī jañgeñ maiñ ne
pahlī hī jañg thī vo jis meñ kaTe haath mire
āḳhirī zaḳhm lagāyā tū ne
tū ne ḳhāmoshī kī shamshīr se maarā mujh ko
tū mujhe maar ke ḳhush thī ki maiñ mar jā.ūñgā
sūkhī miTTī kī tarah ḳhud hī bikhar jā.ūñgā
magar ai merī aziyyat kī amiiñ
maiñ tire ḳhuun meñ maujūd rahūñgā har vaqt