urdu hai mirā naam maiñ 'ḳhusrav' kī pahelī
maiñ 'mīr' kī hamrāz huuñ 'ġhālib' kī sahelī
dakkan ke 'valī' ne mujhe godī meñ khelāyā
'saudā' ke qasīdoñ ne mirā husn baḌhāyā
urdu hai mirā naam maiñ 'ḳhusrav' kī pahelī

'ġhālib' ne bulandī kā safar mujh ko sikhāyā
'hālī' ne muravvat kā sabaq yaad dilāyā
urdu hai mirā naam maiñ 'ḳhusrav' kī pahelī

hai 'zauq' kī azmat ki diye mujh ko sahāre
'chakbast' kī ulfat ne mire ḳhvāb sañvāre
urdu hai mirā naam maiñ 'ḳhusrav' kī pahelī

kyuuñ mujh ko banāte ho ta.assub kā nishāna
maiñ ne to kabhī ḳhud ko musalmāñ nahīñ maanā
urdu hai mirā naam maiñ 'ḳhusrav' kī pahelī